डोंबिवली : विधानसभा २०२४ च्या निवडणुकीत डोंबिवली विधानसभा मतदार संघात महायुतीचे उमेदवार रवींद्र चव्हाण हे सलग चौथ्यांदा जिंकले. डोंबिवली विधानसभा मतदार संघ हा भाजपाचा बाल्लेकिल्ला असल्याचे पुन्हा सिद्ध झाले आहे. महायुतीचे उमेदवार रवींद्र चव्हाण हे या मतदारसंघातून सलग चौथ्यांदा जिंकले.
राज्य निवडणूक आयोगाकडून उमेदवार रवींद्र चव्हाण यांच्या विजयाची अधिकृत घोषणा होताच डोंबिवलीतील संत सावळाराम महाराज क्रीडा संकुलाबाहेर भाजपा कार्यकर्त्यांनी फटाके वाजवत गुलाल उधळत जल्लोष साजरा केला. विजयी उमेदवार रवींद्र चव्हाण यांना पत्रकारांनी विचारले असता ते म्हणाले, डोंबिवली मतदार संघाचा विजय हा विचारधारेचा विजय आहे. महायुतीच्या सर्व कार्यकर्त्यांनी दोन महिन्यात प्रचंड मेहनत केली. मी नेहमीच सांगतो हे शहर महायुतीचा बालेकिल्ला राहिला असून हे चौथ्यांदा सिद्ध झालं आहे. गेली चाळीस वर्ष जनसंघाने हा बालेकिल्ला अबाधित ठेवला आहे. मी मतदारांचे खूप खूप आभार मानतो. खरं तर महायुतीचे सगळे कार्यकर्ते पेटून कामाला लागले होते. हा निर्णयाचा कौल मतदारांनी दिला आहे असे ते म्हणाले.
महायुतीचे उमेदवार रवींद्र चव्हाण यांना १२३८१५ मते मिळाली तर त्याचें प्रतिस्पर्धी महाविकास आघाडी शिवसेना (उबाठा) चे उमेदवार दीपेश म्हात्रे यांना ४६७०९ मिळून रवींद्र चव्हाण यांनी ७७१०६ मतांची आघाडी घेत त्यांचा विजय निश्चित झाला.
कोणत्याही टिप्पण्‍या नाहीत
टिप्पणी पोस्ट करा