डोंबिवली : विद्यार्थ्यांना घडवणारा शिल्पकार म्हणजे शिक्षक आणि त्यांची स्वप्न साकार करणारी संस्था म्हणजेच 'जे एम एफ' शिक्षण संस्था. दरवेळीच 'जे एम एफ' शिक्षण संस्था ही नवनवीन उपक्रम राबविण्यासाठी प्रयत्नशील असते. असाच एक आगळा वेगळा उपक्रम 'जे एम एफ' शिक्षण संस्थेचे संस्थापक माननीय डॉ. राजकुमार कोल्हे आणि संस्थापिका सचिव डॉ. प्रेरणा कोल्हे यांनी 'स्पोर्ट्स पिकनिक' चे आयोजन पनवेल येथील 'विसावा' रिसॉर्ट येथे केले. आनंद उत्साहाच्या भरात 'जन गण मन' इंग्लिश शाळा आणि विद्यामंदिर चे जवळपास पालक, विद्यार्थी शिक्षक मिळून १२०० च्या संख्येत उपलब्ध होते. अतिशय सुंदर आणि निसर्गरम्य परिसरात 'स्पोर्ट्स पिकनिक' चे आयोजन करण्यात आले.
निसर्गाच्या सान्निध्यात हरवून गेलेली सर्वच मुले, पालक ही बस मधून नाचत गात जातानाचा आनंद घेत होती. रिसॉर्ट वर पोहचल्यावर सर्वांनी येथेच्छ नाश्त्यावर ताव मारला, त्यानंतर जन गण मन विद्यामंदिर चे पालक, पाल्य आणि शिक्षक यांनी तरण तलावामध्ये खेळण्याचा आनंद लुटला व त्याचवेळी जन गण मन इंग्लिश सेकंडरी शाळेच्या विद्यार्थ्यांनी खेळाच्या प्रात्यक्षिकांचे प्रदर्शन करून दाखवले. इयत्ता नर्सरी ते दहावीच्या विद्यार्थ्यांनी योगा, झुम्बा, डांबल्स, पिरॅमिड, या आणि अशाप्रकारचे अनेक प्रदर्शने करून सर्वांची मने जिंकली. दोन तासाच्या अवधीनंतर जन गण मन इंग्लिश सेकंडरी शाळेची मुले, पालक, शिक्षक तरण तलावा मधे जाऊन आनंद घेऊ लागली व जन गण मन विद्यामंदिर च्या विद्यार्थ्यांनी पुन्हा एकदा खेळ प्रात्यक्षिक प्रदर्शन दाखवून पालकांची मने जिंकली. झुंबा नृत्य करताना पालकांनी देखील समाविष्ट होऊन नृत्य करण्याचा आनंद घेतला. आनंददायी आणि उत्साही वातावरणामध्ये प्रेक्षकवर्ग व विद्यार्थी यांचा आनंद द्विगुणित होत येथेच्छ भोजनावर ताव मारून सर्वजण तृप्त झाले.
जादूचे प्रयोग हे स्पोर्ट्स पिकनिकचे विशेष आकर्षण होते. जादू म्हणजे स्वप्नवत जग. चुटकी वाजवून इच्छित प्राप्त व्हावे असे हे बालमन. जादूगार संदीप परदेशी यांनी विस्मयरित्या अनेक जादूचे प्रयोग करून मुलांना दाखवले, त्यातच जल्लोष करून मुले आणि पालक हरवून गेली. शिशु विहार मधील वैदिक आणि दिव्या या बालकांनी पाहुण्यांचे पुष्पगुच्छ देऊन स्वागत केले. संस्थेचे संस्थापक माननीय डॉ. राजकुमार कोल्हे आणि सचिव डॉ. प्रेरणा कोल्हे यांनी सर्वांच्या चेहऱ्यावरचा आनंद बघुन समाधानी झाले. आयुष्यामध्ये दुःखाची झालर असेल तरच त्या सुखाचा अर्थ व किंमत कळते, त्याचा आनंद घेता येतो असे डॉ. राजकुमार कोल्हे यांनी सांगितले आणि आज सारी दुःख, विवंचना बाजूला ठेऊन आज जो आनंद तुम्ही लुटला तो पाहून मी कृतकृत्य झालो असे उद्गार काढले.
रोजची तारेवरची कसरत करणाऱ्या माझ्या भगिनींना आजची सुट्टी ना डबा, ना स्वयंपाक अशी मिळाली , मला खूप आनंद होतं आहे की तुम्ही सर्वांनी उत्साहाने सहभाग दर्शवून आपल्या मुलांबरोबर आपले बालपण जगलात, असे सचिव डॉ. प्रेरणा कोल्हे यांनी सांगितले. खजिनदार जान्हवी कोल्हे यांनी सर्व मुलांचे कौतुक करून त्यांना पदक, चषक, प्रशस्तीपत्रक देऊन त्यांचे अभिनंदन केले. सर्व शिक्षक शिक्षकेतर कर्मचारी यांनी जातीने सर्व विद्यार्थी पालकांची काळजी घेऊन सहकार्य केले, त्याच बरोबर इयत्ता चौथी मधील विद्यार्थीनी हिया हीच्या वडिलांनी देखील मुलांना मैदानावर योग्य पद्धतीने बसवून देण्याचे सहकार्य केले. मुख्याध्यापक ज्योति व्यंकट रामन, श्री. आमोद वैद्य, उप-मुख्याध्यापिका ममता राय, तेजावती कोटियन, शिशु विहार उप-मुख्याध्यापिका सौ. मयुरी खोब्रागडे यांचे मोलाचे सहकार्य लाभले. तर सर्व शिक्षक, कलात्मक शिक्षक सौ.श्रेया कुलकर्णी, सौ.कविता गुप्ता, दीपा तांबे, अभिषेक देसाई, प्रमोद पगारे, रमेश वगे, सौ.वैशाली शिंदे, दिपाली सोलकर यांनी मुलांना योग्य प्रशिक्षण व मार्गदर्शन दिले. सर्व पालक वर्गानी आयोजित केलेल्या एक दिवसीय सहलीचे भरभरून वर्णन केले. सर्वांचे आवडीचे आइस्क्रीम खाऊन आनंदाने सर्व विद्यार्थी, पालक वर्ग परतीच्या प्रवासाला निघाला.
कोणत्याही टिप्पण्‍या नाहीत
टिप्पणी पोस्ट करा