कल्याण : बनावट फोन पे ऍपवर पैसे पाठवल्याचे दाखवून किराणा दुकानदारांना गंडा घालणाऱ्या दोघांना कोळसेवाडी पोलीसांनी अटक केली आहे. कोळसेवाडी पोलीस स्टेशनच्या हद्दीत २६ फेब्रुवारी रोजी दुपारी कल्याण पूर्वेतील तिसगांव नाका येथील आर.के.बाझार या सुपर मार्केटमध्ये दोन इसम येवुन त्यांनी फिर्यादी यांच्या सुपर मार्केट मधुन किराणा सामान मधील ६२९३/- रू. किंमतीच्या वस्तु विकत घेतल्या. फिर्यादी यांच्या भावाला ऑनलाईन बिल भरतो असे सांगुन त्यांनी हे बिल अदा केल्याबाबत बनावट फोन पे ऍपवर दाखवुन बिल पेड न करता फिर्यादी यांची फसवणुक केली. याबाबत विशाल बोडके यांच्या फिर्यादीनुसार कोळसेवाडी पोलीसांनी गुन्हा दाखल करत तपास सुरू केला.
या दाखल गुन्ह्याचा कोळसेवाडी पोलीस स्टेशनचे वपोनि. गणेश न्हायदे यांच्या मार्गदर्शनाखाली पोउनि. सिराज शेख व गुन्हे प्रकटीकरण पथकाचे सपोनि. दर्शन पाटील व त्यांच्या पथकाने गुन्ह्याचा तांत्रिक तपास करून या गुन्ह्यातील फसवणुक करून गेलेले आरोपी पंकज पाटील (वय: २२ वर्षे), व अनिल कांबळे (वय: २४ वर्षे), दोघेही राहणार ठाणे या दोन आरोपींना अटक केली. त्यांच्याकडे सखोल तपास करून कोळसेवाडी पोलीस स्टेशन व मानपाडा पोलीस स्टेशन येथे दाखल गुन्ह्यातील मुद्देमाल जप्त करून दोन गुन्हे उघडकीस आणले आहेत. आरोपींच्या ताब्यातुन एकुण १६ हजार ४५५ रूपये किंमतीचा किराणा माल वस्तु व एकुण चार मोबाईल फोन असा मुद्देमाल जप्त केला आहे.
सदरची कारवाई पोलीस उप-आयुक्त अतुल झेंडे व सहा. पोलीस आयुक्त कल्याणजी घेटे यांच्या मार्गदर्शनाखाली कोळसेवाडी पोलीस स्टेशनचे वपोनि. गणेश न्हायदे, पोनि. प्रशासन नाईक यांच्या सूचने प्रमाणे सपोनि. दर्शन पाटील, पोउनि. सिराज शेख, पोहवा. बोरसे, सांगळे, कापडी, जरग, सांगळे, पोशि. सोनावळे, गिते यांच्या पथकाने यशस्वीपणे केली आहे.
कोणत्याही टिप्पण्‍या नाहीत
टिप्पणी पोस्ट करा