सामान्यतः महापालिकेला निवेदने आणि पत्रे दिली जातात, पण यावेळी मनसेने वेगळा मार्ग अवलंबला. "A4 साईजच्या कागदाकडे दुर्लक्ष केले जाऊ नये, म्हणून थेट ३ फूट लांबीचे पत्र देऊन प्रशासनाचे डोळे उघडण्याचा प्रयत्न केला," असे संदीप राणे यांनी स्पष्ट केले. या पत्रात कर्मचाऱ्यांचे थकीत वेतन तत्काळ देण्याची मागणी करण्यात आली आहे.
महापालिका प्रशासनाचा ढिसाळ कारभार!
महापालिकेतील कर्मचाऱ्यांना वेळेवर वेतन मिळाले नाही तर त्यांच्या कुटुंबीयांवर आर्थिक संकट कोसळते. असे असतानाही प्रशासनाकडून कोणतीही ठोस भूमिका घेतली जात नसल्याने कर्मचारी अस्वस्थ आहेत. यापूर्वीही अशा प्रकारचे प्रकार समोर आले असून, महापालिकेच्या कारभारावर प्रश्नचिन्ह उभे राहिले आहे.
संदीप राणे यांचा थेट सवाल – "आयुक्त साहेब, उत्तर द्या!"
"महापालिकेत नव्या आयुक्तांची नियुक्ती झाल्यानंतर कर्मचाऱ्यांना दिलासा मिळेल, अशी अपेक्षा होती. मात्र, स्थिती जैसे थे आहे. आता तरी कर्मचाऱ्यांना त्यांचे थकीत वेतन मिळेल का? की हा बेजबाबदार कारभार असाच सुरू राहणार?" असा थेट सवाल मनसे शहराध्यक्ष संदीप राणे यांनी केला आहे.
मनसेचा इशारा – अन्यथा तीव्र आंदोलन!
जर लवकरात लवकर कर्मचाऱ्यांचे थकीत वेतन दिले गेले नाही, तर मनसे आणखी तीव्र आंदोलन छेडेल, असा इशाराही देण्यात आला आहे. मनसेच्या या आक्रमक भूमिकेमुळे महापालिका प्रशासन हादरले असून, आता आयुक्त काय भूमिका घेतात, याकडे सर्वांचे लक्ष लागले आहे.
महापालिकेतील कर्मचाऱ्यांचे पगार थकीत असणे ही गंभीर बाब असून, प्रशासनाने तातडीने यावर निर्णय घेण्याची गरज आहे. अन्यथा, मनसेच्या आंदोलनामुळे हा विषय अधिक चिघळण्याची शक्यता नाकारता येत नाही!
कोणत्याही टिप्पण्‍या नाहीत
टिप्पणी पोस्ट करा